Lekarozko Aroztegiako proiektuaz

Grabazio sistemaren arazo bategatik ezin izan dute deklaratu Baztango hautetsiek Auzitegian

Grabazio sistemaren arazo bategatik ezin izan dute deklaratu Baztango hautetsiek Auzitegian
Joseba Otondo alkateak adierazpenak egin ditu auzitegiko atarian.

Irailean bueltatu beharko dute alkateak eta udal gobernu taldeko lau zinegotzik 

Palacio de Aroztegiako promotoreek Baztango alkate Joseba Otondoren eta udal gobernu taldeko lau zinegotziren kontra paraturiko salaketa dela eta, gaur egin behar zen deklarazioa ez dute egin, Nafarroako Auzitegi Nagusiko grabazio sistemarekin arazoak zeudelako. Irailean deituko dituzte berriz. Otondok jazarpena salatu du.

 

Bertze behin ere Baztango hautetsiak epaile aitzinean izan dira Palacio de Aroztegia enpresak salatuta. «Pelotazo urbanistikoaren» kontrako protesta bat herriko plazan baimentzeagatik salatuak izan dira oraingoan. Baztandik Iruñeraino eramanarazi eta grabazio sistemaren arazo batengatik ezin izan dute epaile aitzinean deklaratu eta hori gogor salatu dute. «Palacio de Aroztegiak dirua ausarki dauka eta hori erabiltzen du, baina guk gure lan orduak galdu ditugu, baztandarrek harrera eta zerbitzua emateko denbora galarazi, deustarako ere», erran du alkateak.

Toki berean elkarretaratzea egin dute, Jazarpen judizialik ez. Aroztegia gelditu lemarekin. Joseba Otondo alkateak salatu duenez «Palacio de Aroztegiak baztandarrak hankapean hartu nahi ditu, Baztango erakundeak suntsitu eta herri-lurrak bereganatu. Eta beraien erranetara ez makurtzeagatik, izutu nahi gaitu. Baina herritarren alde zutik segituko dugu, ez gaituzte menpean hartuko».

TTIPI-TTAPA da Nafarroa Garaiko mendialdean dagoen euskarazko hamaboskari bakarra, eta zu bezalako irakurleen babesa behar du aitzinera egiteko.


Izan zaitez harpidedun