Bi ibilbide izanen dituzte aukera, 33 eta 24 kilometrokoak
Baztango Mendigoizaleak elkarteak antolatutako Baztango Mendi Itzuliak 25 urte beteko ditu maiatzaren 27an eta Gartzainen hasi eta akituko da. Mendizaleek bi ibilbide izanen dituzte aukeran, 33 kilometrokoa eta 1.900 metroko malda duena eta 24 kilometrokoa, 1.300 metroko maldarekin. Igandean 07:00etatik 07:30era aterako dira herritik eta Azaldegi izanen da ibilbideko gailurrik altuena. Izena emateko bi aukera daude: Internetez izena emateko epea bukatu da, baina itzuliaren egunean ere egin daiteke (12 euro).
Ibilbide laburrekoek Gartzaindik atera eta Pikota barna Azaldegira igoko dira, Urballo, Bailei eta Ezkaldon barna Gartzainera itzultzeko. Ibilbide luzekoek, berriz, Azaldegi eta Urballotik pasatu ondotik, oraindik Harrikulunka aldera jo beharko dute, Napoleonen bidean barna Maisterniara jautsi, Zaharretara igo eta berriz ere Ezkaldon, ibilbide laburrarekin bat egiteko.
Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.