Apirilaren 21erako sarrera guztiak akitu direla ikusirik, apirilaren 22an berriz eskainiko dute. Sarrerak Arkupe eta Malkorra Gozotegietan jarriko dituzte salgai
Elizondoko Abesbatzak, 2017an, 75. urteurrenaren harira, Josu Elberdin konpositore pasaitarrarekin bi tailer antolatu zituen: bata haurren abesbatzarekin; eta bertzea helduekin. Tailer horien ondotik, lan handi bat taularatzeko ideia sortu zen. Hari horri tiraka prestaturiko musikala da Jolasean. Apirilaren 21ean, larunbatean, Elizondoko Baztan Pilotalekuan 20:30ean aurkeztea aurreikusi bazuten ere, sarreren salmentak izaniko arrakasta ikusirik, biharamunean, hilaren 22an, ordu eta toki berean, berriz eskaintzea erabaki dute.
Sarrerak Arkupe eta Malkorra gozotegietan jarriko dituzte salgai. 60 minutuko musikalaz gozatu nahi duten helduek 10 euro eta hamabi urte arteko haurrek 5 euro ordaindu beharko dituzte. Musikalean haurren abesbatzak, haur bakarlariek eta hiru abeslari helduk parte hartzen dute, narratzailea lagun dutela. Euskaraz eskainiko den arren, gaztelaniaz idatziriko testuak banatuko dira.
Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.