Kontzertua larunbatean 20:00etan izanen bada ere, bi abesbatzak arratsaldeko lehen orduan elkartuko dira elkarrekin kanta berriak lantzeko tailertxoa egin asmoz, eta ahal izanez gero, horietakoren bat kontzertuan eskainiko dute.
Egitaraua
Gaztelu taldeak, Fernando Cortijoren zuzendaritzapean Nafarroa arragoa (Xabier Lete), Hiru txito (herrikoa), Oi Lur (Benito Lertxundi) eta Herribera (Benito Lertxundi) abestuko ditu. Kantu guztiak, Fernando Cortijo beraren moldaketekin.
Ondotik, Mendi Abesbatzak, Jon Iratzokiren zuzendaritzapean, Agurra (herrikoa), Hallelujah (Leonard Cohen), Itsasoa Gara (Xabier Sarasola), Aritz adarrean-Kattalin (Julen Ezkurra), Haurrak lotaratzeko soinua (herrikoa), Tu es Petrus (Hilarión Eslava) eta Salve Regina (Jesús Sorozabal) abestuko du.
Bakarlari moduan, Bixi Ameztoi eta Alicia Telletxea sopranoak, Ruth Etxebeste piano eta organu jolea, Itziari Irigoien txistularia eta Gorka Fuentes eskusoinu jolea ariko dira.
Amaiurko organoa
Amaiurko Elizako organuari dagokionez, azpimarratzekoa da 2002an Nafarroako Gobernuak Kultura-Intereseko Ondasun izendapena eman ziola. Organu erromantikoa da, Cavaille-Coll organugile entzutetsuarena eta Amaiurren badago ere, bere lehendabiziko kokalekua Elizondoko Parrokia izan zen. 1919an eraman zuten Elizondotik Amaiurrera.
