erran.eus

Baratzeko haziak mantentzeko ikastaroarekin abiatuko da Baztango Agroekologia Eskola Herritarra

  Gizartea  Baztan

Oronozko batzartokian eskainiko du Ruth Peñak, Baztango Agroekologia Eskola Herritarraren baitan 

Bigarren urtez eginen den Baztango Agroekologia Eskola Herritarraren baitan, baratzeko haziak mantentzeko ikastaroa eskainiko du Ruth Peña baratzezainak otsailaren 24an, larunbatean 10:00etatik 12:00etara Oronozko batzartokian. Izena emateko hazitikhozie1@gmail.com helbidera idatzi behar da.

Baratzeko haziak mantentzeko ikastaroarekin abiatuko da Baztango Agroekologia Eskola Herritarra
Baztango Agroekologia Eskola Herritarrean parte hartzen duten erakunde eta taldeetako kideek aurkezpena egin dute Baztango Balleko Etxean. Argazkia: Juan Mari Ondikol | Ikusi handiago | Argazki originala

 

Balleko Etxean otsailaren 20an egindako aurkezpenean, Joseba Otondo Baztango alkatea eta Hazitik Hozie elkarteko kideak aipatu dutenez, «bigarren urtez, Baztango Agroekologia Eskola Herritarra eginen dugu Baztanen. Eskola honen helburua herritarrak agroekologiarat hurbiltzea da. Agroekologiak etorkizuna erran nahi du. Agroekologia jaten dugunaz kezkatzea da, jatekoak produzitzeko teknika eta moduetaz ardura hartzea, lan-harreman eta bizi-baldintza justuak bulkatzea, ingurugiroa eta osasuna zaintzea, landa-eremu bizien alde lana egitea. Gaur egun nagusi den produzitzeko eredu industrial eta intentsiboarekin nekazariak hankapean hartzen dituzte, kontsumitzaileak jateko eskasekin  bazkatzen, landa-eremuak desegituratu eta husten; ingurunea pozoitzen. Bizia maite dugulako, eredu aldaketa bulkatu beharra dago, agroekologiaren bidea ibili».

Ildo horretatik, iaz, Baztango zortzi elkarte eta erakunderen ekimenak koordinatu eta Baztango Agroekologia Eskola Herritarraren izenburupean egitarau bateratua eskaini zuten. 120 herritarrek parte hartu zuten ekitaldietan. Alde horretatik, bai edukietan bai parte hartzean balorazio positiboa egin dute.

Aurten elkarte eta erakunde gehiagok parte hartuko dute eta eskaintza ia osorik berritu ahal izan dute, «agroekologiaren aukerak mugagabeak direnaren erakusle». Hazitik hozie, EHNE, Lekarozko Legate elkartea, Elizondoko Aise eta Erlategi elkarteak, Berroetako Gure ametsa elkartea, Anizko Mendiarte elkartea, Anizko herria, Zigako herria, Berroetako herria, Elizondo herria eta Baztango Udala dira parte-hartzaileak.

 

Haziaren Eguna martxoaren 10ean Zigan eta bertze hainbat ekitaldi

Hazitik Hoziek antolatzen duen Haziaren Eguna Zigan eginen dute aurten martxaren 10ean, Zigako herria ere antolaketan lagun dutela. Larunbat goizeko 10:30ean hazien trukea eginen dute. 12:30ean Jakoba Errekondorekin mintzaldia.

Solasaldia: Glisofatoa-Rondup,inguruaren pozoiketa eta jendeen minbizia

Martxoaren 22an,  Elizondon, Arizkunenean, 19:30tan. Elean Paul Bengoa EHNEko teknikaria

 

Bertako zuhaitz espezie eta barietateak ezagutzeko ibilaldia

Martxoaren 24an, Berroetan, 9:00tan; gidaria: Xabier Zabaleta

 

Garagardo ekologikoa egiteko ikastaroa

Apirilan, Aise elkartean, Elizondon

 

Gasnagintza ikastaroa

Maiatzaren 12an, Elizondon, Autxitxia gasnategian. Irakaslea Ramon Agirre

 

Larraldea sagardotegi eta sagardi ekologikorat ateraldia

Ereiaroan, Lekarozen. Gidaria: Jesus Angel Garcia

 

Asteburu mikologikoa

Buruila-urrian. Ibilaldia, erakusketa eta dastaketa. Elizondon

 

Inguruen izenak eta toponomia ezagutzeko ibilaldia

Urrian Antzanborda-Berro aldean, Elizondon.

Azaroan Aniz inguruan.

 

Zerri mondonga ikastaroa II

Abenduan. Aurten patea, saltxitxoia eta odolkiari buruz. Irakaslea Lorentzo Sarratea

 

Ogi ekologikoa egiteko ikastaroa

Abenduan. Irakaslea Xabier Akizu. 

2018/02/24 10:00

Oronozko batzartokia Baztan

Ekitaldi gehiago »»

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa