Ilbeltzaren 19an, ortziralean, Anizko eta Berroetako gazteak geldituko dira afaltzeko eta barnak berotzen hasteko, baina egun handia larunbatean, 20an, izanen da. Goizeko 9etan Anizko Mendiarte kultur elkartean elkartuko dira gosaria egiteko. Gosaria egin ondotik, mozorrotu eta etxez etxe ibiliko dira musikariekin batera puskak biltzen: xingarra, xixtorra, arraultzak... Bildutako puskak xaretorat bildu eta xaretoa betetakoan elkarterat eramanen dute hustera, bertan izanen baitira zenbait aniztar pusketan bildutakoarekin afaria egiteko prest.
Hondarreko urtetan bezala, aurten ere etxez etxe inauteetan parte hartu duten gazteez gain, aniztar guztiendako afaria izanen da elkartean, ondotik Salaberrirekin dantzaldi-kantaldia gauak ematen duen artio.
Ondoko larunbatean, 27an, gauza bera izanen da, baina hontakoan aniztarrak izanen dira Berroetarat joanen direnak.
Larunbateko bestondoa porrokatzeko astirik izan gabe, igandean, ilbeltzaren 21ean, (H)ilbeltza ekimenak antolatutako ipuin antzeztua izanen da Anizen goizeko 11etan. Ekimen honetarat aniztarrez gain, gainerako guztiak ere gonbidatuak daude. Itzuliaren ondotik gosaria izanen da Mendiarte kultur elkartean.