Hogei bat bizilagun bertzerik ez ziren agertu larunbatean batzarrera, Alazne Sansiñena alkateak eta bere kargodunek aurkeztutako kontuen berri izatera.
Diru sarrerak
Elizondoko bizilagunek ordaintzen duten kuotaren bidez izan ziren diru-sarrera handienak, 37.545,54 euro. Bestetan 28.453 euro bildu ziren, gehien bat programako publizitatearen (11.160) eta zikiro-jateko txartelen salmentarekin (11.800) euro lortutakoak. Udazkeneko ferietako salmenta postuen tasen bidez 25.146 euro bildu ziren eta Balleko Etxeak herri guztiei ematen dien urteko diru-kopuruan, Elizondok 10.931 euro ja1so zituen (bizilagun bakoitzeko 3 euro). Errentengatik 4.440,79 euro, Orakunden 4.647,40 euro, inauterietan 1.240 euro eta Txokotoko bestetako bazkarian 795 euro bildu ziren.
Gastuak
Balleko Etxeari elkarlanerako emandako 35.298,59 euroak dira gasturik handienak eta horrek eragiten du defizita. Iriarte pilotalekuari estaldura emateko erabili zen zatirik handiena eta horri esker, frontoiaren erabilera ere aunitz igo da. Horretaz gain, Foruen Plazako kiosko berriari baranda egiteko ere bideratu da diru zati bat. Santiago besten antolaketan 51.004,28 euro erabili dira, Txokotoko bestetan 6.340,74 euro, mantenu-lanetan 3.296,45 euro (mendiko plantazioetan garbitze-lanak, erraldoi eta buruhandiak, Herriko Etxean lanak…), Udazkeneko ferien antolaketan 2.769,97 euro, Orakunde eguneko haurren ospakizuna antolatzeko 5.9991,76 euro eta 600 euroko dirulaguntza Beartzun auzoko bestetarako.