Euskal Nobela Beltzaren astea ospatuko dute urtarrilaren 15etik 21era bitarte

Ttipi-Ttapa/Xorroxin 2018ko urt. 8a, 09:00
2018ko Nobela Beltzaren Astea iragarriko duen kartela

Idazle, irakurle eta literaturzaleen gozamenerako, ekitaldiz betetako astea antolatu du (H)ilbeltza elkarteak

(H)ilbeltza elkartearen eskutik, eta Arizkungo Zurubi Elkartea, Amaiurko Elkartea, Erratzuko Kultur Elkartea, Erratzuko Etxeleberteko Txokoa eta Anizko Elkartearen laguntzaz, aurten ere, Euskal Nobela Beltzaren astea ospatuko dute Baztanen. Urtarrilaren 15etik 21era bitarte, idazle, irakurle edota literaturzaleek, belztasunean, idazleen liburu aurkezpenetan, mahai inguruko tertulia gozoetan, filmak edota ipuin antzeztuak ikusiz… han eta hemen, gozamenerako tartea izanen dute.

 

Ilbeltzaren 15ean, astelehenean, Telleria eta gero, zer? liburuaren harira, Ernesto Prat Irzainzkiren solasaldiarekin hasiko dute aste beltza, Arizkungo Liburutegi beltzan (medikuaren etxean), 19:30ean.

Asteazkenean, ilbeltzaren 17an Txomin Peillenek hartuko du lekukoa. Joxe Angel Irigarai elkarrizketatzaile duela, Amaiurko elkartean, 19:00etan, solasaldia eskainiko du. Ilbeltzaren 19an, ortziralean, Chinatown filma izanen da ikusgai, Nerea Arrutiren eskutik, Elizondoko Arizkunenea Kultur Etxean, 19:00etan.

Biharamunerako, ilbeltzaren 20rako, egun osoko egitaraua antolatu dute. Beltzaren estereotipoak literaturatik ikusentzunezkoetarat mahai inguruan bilduko dira Iratxe Fresneda eta Irati Jimenezekin batera, Arantxa Iturbe moderatzaile dutela.

Ondotik, 14:00etan, Erratzuko Elkartean bazkalduko dute. Bazkalondoan, lau liburu-aurkezpen izanen dituzte: Jon Arretxeren Arrutiren banda, Pierre Mestroten Bihotz ebatsiak, Galder Perezen Morbus operandi antzezlanaren gidoia eta John Anduezaren Danba!, hain zuzen. Iluntzean, susmagarrien gauean ibiliko dira.

Nobela Beltzaren Astea borobiltzeko, igandean, hilaren 21ean, 11:00etan ipuin antzeztua izanen dute, Anizen. Arratsaldeko 7etan, berriz, Hama(H)iru ate ikuskizuna eskianiko dute, Jauregiarten, Mitxel Sarasketa, Iñigo Belzunegi eta (H)ilbeltzakideek.

 

Erlazionatuak

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.


Egin TTIPI-TTAPAren lagun