Udalak denera 105.829 euroko inbertsioa egin du, bi alditan: lehenengoan 2014. urtean instalakuntza berriaren eraikuntza 82.829 euroko inbertsioarekin (Europako Leader programatik 32.000 eurorekin diruz lagundua). Bigarrena aurten, azienda hila sartzeko erraiaren moldaketa, motordun garabi ttikia paratzea… denera 23.100 euroko inbertsioarekin. Modu berean, hiltegiaren kudeatzaileak 22.000 euroko inbertsioa egin du, kasu honetan hutsean ontziratzeko makina, haragi zerrak egitekoa eta haragia xehatzekoa erosteko.
Hiltegian zatitze zerbitzua paratzeko erabakia 2011-2015 legealdian hartu zen hiltegiari buruz gogoetatzeko antolatutako foroetan. Zerbitzua herritarrei orokorrean eta salmenta zuzenean aritu nahi duten nekazariei bideratua dago, baita harakinei ere. Zerbitzu honek, aldi berean, hiltegiarendako lan-berria suposatuko du eta, beharbada, errefortzuko lanposturen bat.
Prezioak
Azaroko osoko bilkuran behin-behinean onartutako zatiketa zerbitzuaren prezioak hauek dira:
Aratxeki-behiki zatiketa, pisua kanalean 270 kilokoa edo guttiagokoa bada 0,50 euro kiloa
Aratxeki-behiki zatiketa, kanaleko pisua 270 kilo baino gehiagokoa bada 0,45 euro kiloa
Aratxeki-behikiaren ontziratzea (ontziragailuaren erabilera) 20 euro buruko
Aratxeki-behikiaren hustuketa 0,30 euro kiloa
Aratxeki-behikiaren ontziratzea 0,36 euro kiloa
Ardikiaren zatitzea 0,80 euro kiloa
Bildotski edo pittikiaren zatitzea euro bat kiloa
Ardikiaren kanala bitan zatitzea euro bat kiloa
Zerrikiaren zatitzea, kanaleko pisua 160 kilo eta guttiagokoa bada 0,30 euro kiloa
Zerrikiaren zatitzea, kanaleko pisua 160 kilo baino gehiagokoa bada 0,25 euro kiloa
Zerrikumearen kanala bitan zatitzea euro bat kiloa
Zerrikumea ontziratzea 0,50 euro kiloa
2016ko udan hiltegiaren kudeaketa berria esleitu zen, udaleko gehiengoak, kudeaketa ez zuzena egitea erabaki baitzuen. Geroztik, Baztango Hiltegia S.L.k kudeatzen du. Gaur egun bortz langile lanean ari dira.
Baztango Udalarendako Loizu hiltegia tokiko garapen sozioekonomikorako estrategikoa da. Hori dela eta gaurgero zahartzen ari diren instalakuntzen berritzean segitzeko konpromisoa du.