1.400 familiari arreta-zerbitzua eskaintzeko espezialista bakar bat, eta hiru orduz baino ez, izateak dakartzan laguntza, ardura eta zaintza gabeziak jasangaitzak direla adierazi dute herritarrek. Otsailera bitarte, Elizondoko Osasun Etxeko pediatra lanaldi osoan ari zen. Alabaina, horrek, lekualdatzea eskatu zuen. Orain, 8:00etatik 11:00etara baino ez dute, ondotik, pediatra Ultzamara joaten baita.
Orain artean gurasoek, beren kexak Nafarroako Gobernura bideratu dituzte, eta jasotako erantzun bakarra pediatria espezialistetan gabeziak daudela izan da. Aitzitik, bataz bertze, 800 haurren arretarako pediatra bat izan ohi dela aintzat hartuz, eta Baztanen 1.400 inguru direnez gero, bi pediatren beharra adierazi zuten: bat lanaldi osorako, eta bertzea, lanaldi erdian aritzeko.
Hori horrela, Nafarroako Osasun Zerbitzuak, Osasunbideak, Baztan eta Ultzamarako, zehazki, Elizondo eta Larraintzarko Osasun Etxeetarako, pediatra bat paratu du, 2017ko Enplegu Publikoko Eskaintzan eskainiriko mediku lanpostuarekin batera.
Hala, 8:00etatik 11:00etara bitarte pediatra bat, 11:00etatik 13:00etara bitarte enfermeria zerbitzua eta behar izatekotan, mediku arreta eta 13etatik 15:30era pediatrian eskarmentu handia duen medikua izanen dute.