erran.eus

Dolores Redondo idazleari omenaldia eskaini dio Baztango Udalak

  Gizartea  Baztan

Baztango trilogia idatzi duen idazle donostiarrak aipatu duenez, Amaia Salazar inspektorearen historiekin segituko du

Dolores Redondo idazle donostiarrari omenaldia eskaini zioten irailaren 29an Baztango Balleko Etxean, dagoeneko 36 hizkuntzatara itzuli diren Baztango Trilogiako eleberrietan bailara sustatzeko egin duen lana eskertuz. 

Dolores Redondo idazleari omenaldia eskaini dio Baztango Udalak
Dolores Redondok Baztango Balleko Etxearen omenaldia jaso zuen San Migel egunean. Argazkia: Juan Mari Ondikol | Ikusi handiago | Argazki originala

Baztango Txistulariek harrera egin zioten Balleko Etxe atarian eta gero, barnean, ekitaldi xalo bezain sentitua eskaini zioten. Ana Larruy kultura koordinatzaileak Redondoren ibilbidearen errepasoa egin zuen, sukaldari zenetik hasi eta Planeta Saria lortu arte. Segidan, Joseba Otondo alkateak, udalaren eta herriaren izenean eskerrak eman zizkion Baztan mundu osoan ezagutzera emateagatik, Henning Mankell-ek Suedia eta Andrea Camillerik Sizilia Montalbano inspektorearekin ezagutzera eman dituzten bezalaxe. “Baztango Trilogiari esker ezagutzera eman gaitu eta hori harro egoteko modukoa da, arras pozgarria eta polita”.

Alkateak Baztanen girotutako literaturaren errepasoa egin zuen eta euskaraz idatzitako lehen polizia-eleberria Elizondon girotua dela aipatu zuen eta Mariano Izeta elizondarraren Dirua Galgarri eleberria ere gogoratu zuen.

Dolores Redondo idazleak aipatu zuenez, harritua dago turistak Baztanen bere eleberrietako lekuen bila ikusten dituenean. Bere liburuetako kokaleku moduan Baztan zergatik aukeratu duen ere azaldu zuen, “leku berezia baita, ez da berdina Baztan aukeratzea edo bertze eozein aukeratzea, Baztanek eta Elizondok nik bilatzen nuen guztia biltzen zuten, arkitektura harrigarria dauka, armarria, mitologia, sinesmenak… dena dauka. Herri honetaz maitemindua nagi, bisitariak ongi hartu eta zaintzen dituzue ”.

Udalak Baztani buruzko liburu-xorta eta bertako produktuen saskia eman zion opari. Udal ordezkariekin batera, Pontas literatur-agentziako Ricard Domingo eta Anna Soler-Pont, Destino argitaletxeko Albá Fité eta Dolores Redondoren senide eta lagunak izan ziren ekitaldian.

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa