Kataluniako emaitzak onartuz eta errepresioa salatuz mozioa onartu du Baztango Batzar Nagusiak

Ttipi-Ttapa 2017ko urr. 3a, 10:35

Aldeko 20 bozka jaso zituen, Geroa Bairen bi abstentzio eta UPNko hiru hautetsiek bozka emateari uko egin zioten

Igandean Katalunian egin zen autodeterminazio erreferendumak Baztango Batzar Nagusiaren babesa eta onarpena jaso zuen urriaren 2an egin zuen ohiko bilkuran. Igandeko galdeketari eta prozesu osoari zilegitasuna aitortzeaz gain, emaitzak errekonozituz. 

 

Modu berean Batzar Nagusiak Espainiako estatuak buruturiko erasoak salatu zituen bertan izandako eskubideen urraketa, bortizkeria eta errepresio basatia gaitzetsiz. Bidenabar Kataluniako herriari eta zaurituei elkartasuna adierazteko erabakia hartu zuen eta “Euskal Herria, Katalunia edo munduko gainerako herrietan, herritarren borondate askean oinarrituta garatzen dituzten prozesu politikoen alde egiteko konpromisoa” hartu zuen. 

Asteleheneko mozioa EH Bilduk premiazko puntu bezala sartu zuen eta bildutako batzarkideen aldeko 20 bozka eta Geroa Bairen bi abstentzio izan zituen. UPNko hiru hautetsiek bozka emateari uko egin zioten.

Bertzalde, igandean Erratzun Kataluniarekin elkartasuna agertzeko bozketa sinbolikoa egin zuten eta ilunabarrean Elizondon, Katalunian bizi izandako errepresioa salatzeko elkarretaratzea egin zen.

 

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.


Egin TTIPI-TTAPAren lagun