Behi azienda pirinaikoaren 30. Lehiaketa-enkantea irailaren 23 eta 24an ospatuko dute Elizondon

Ttipi-Ttapa 2017ko ira. 18a, 15:53

Nerea Beginoren 'Birramona' argazkiak lortu argazki lehiaketako lehen saria eta irudiarekin kartela osatu dute.

26 ganadutegietako 210 azienda aurkeztuko dira lehiaketara eta aste honetan pintxo, salda eta bustiak eskainiko dituzte inguruko 13 jatetxe eta ostatutan

Pirinioko behi azienden nazio mailako Lehiaketa-enkanteak 30. edizioa beteko du irailaren 23 eta 24an Elizondon, Baztango Udalak eta Aspina eta Conaspi erakundeek, bertze hainbat babesleren laguntzarekin antolatua. Irailaren 18an egindako aurkezpenean aipatu dutenez, 26 ganadutegietako aziendak espero dituzte, 15 Nafarroakoak, 6 Bizkaikoak eta 5 Gipuzkoakoak. 210 azienda aurkeztuko dira lehiaketara eta bertze 30 saltzeko jarriko dituzte.

Aurtengo berrikuntzen artean, lehen aldiz azienda pirenaikoa gaitzat hartuta argazki lehiaketa antolatu dute eta bertan irabazle suertatu den Nerea Begino Mendiburu igantziarraren argazkia erabili dute kartela egiteko.

Egitaraua

Larunbat goizeko 9:00ak baino lehen sartuko dira aziendak eta ordu horretatik aitzinera hasiko dira txanda kalifikatzaileak. 10:00etatik 14:00etara eta 17:00etatik 20:00etara Baztango artisautza eta nekazaritza elikagaien azoka eginen dute. 17:30etik 20:00etara behi aziendaren erakustaldia eta txanda kalifikatzaileak eginen dira.

Igandeko egitarauari dagokionez, 09:00etatik 12:00etara behi-aziendaren erakustaldia eginen dute. 10:00etatik 14:00etara Baztango artisautza eta nekazaritza azoka eginen da. 11:30ean, Nafarroako aratxea haragi eta Kortariko gasna dastaketa. Azpilkuetako eskolako Guraso Elkartea arduratuko da horiek banatzeaz. 12:30ean behi-azienda enkantea eta 13:00etan azienda lehiaketaren sari eta garaikur banaketa eginen dute.

Irailaren 22an, ortziralean, abelburuak Merkatuko Plazan sartzeko aukera izanen da arratsaldeko 3etatik aitzinera.

Pintxo, salda eta bustian

Lehiaketa-enkantea girotzeko, irailaren 18tik 24ra pintxo, salda eta bustiez gozatzeko ibilbide bat egiteko aukera eskaintzen dute 13 jatetxe eta ostatutan: Olaben Lorentxo; Oronozen Hotel Urgain; Elizondon Sobrino, Goizalde, Casino, Futbolin, Karrika eta Mendi; Iruritan Olari; Elbeteko Ostatua; Arizkunen Bixta Eder eta Uxoa eta Ordoki auzoan Ordoki Erretegia.

Gizartea Baztan Elizondo

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.

Egin TTIPI-TTAPAren lagun