Harat hurbildutakoei kontzentrazio partzelarioak zer dakarren azaldu zien Imazek; zer pauso eman behar diren eta bakoitzari nola eraginen zion. Herritarren galderei erantzunez herri inguruko lur urbanizagarriak kontzentraziotik kanpo geldituko zirela erran zien.
Kontzentrazio partzelario prozesua nekazal etxaldeen %70aren babesarekin hasten ahal da. Iduriz, Anizen nahiko aldekoak dira, horregatik, aipatu nekazal etxaldeen babesa eskuratzen saiatuko dira. Imazek erran zuenez «prozesu guztia herritarrekin egonez egiten da, beren kezkak eta erranak kontuan hartuz». Modu berean, gobernuko teknikariaren ustez, 2018ko gobernuaren aurrekontuetan Anizko kontzentraziorako kontu-saila egiteko aukera legoke.
Aniztarrek batzarra baikor baloratu zuten eta Udalak ere bai. Amaiurren kontzentrazio partzelarioei buruz egin zen mintzalditik, politi-poliki pausuak ematen ari dira eta, horren lekuko, udalaren eskariz joan den ereiaroan Gobernuko teknikariak Anizerat egin zuten bisitaldia. Aniztarrak ados badaude, Baztan mailako lehendabiziko esperientzia Basaburuko herri horretan egin nahiko luke udalak.
Lurren jabeak eta Nafarroako Gobernuko eta Udaleko ordezkariak bildu dira
Orain urte eta erdi kontzentrazio partzelarioari buruz Baztango Udalak abiaturiko gogoetaldiari jarraikiz Anizen urrats berria eman dute. Abuztuaren 11n Anizko lurren jabeekin batzarra egin zen eta Mikel Imaz, Nafarroako Gobernuko nekazal azpiegituretako arduradunak eta Juan Kruz Iriartek Baztango Udaleko nekazaritzako eta mendietako zinegotzia bertan izan ziren.
Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.
Egin TTIPI-TTAPAren lagun