Ohitura segituz, boletoak euro 1ean daude salgai eta Baztango komertzio zein ostatu ugaritan aurkitu daitezke. Sariak ere, urtero bezala Baztandarren Biltzarrako egoitzan eskuratu ahalko dira; ekainak 3tik Baztandarren Biltzarra besta arte, larunbatero, goizeko 11:00etatik 13:00tara. Gogoratu sariak hartzeko bai edo bai egoitza honetatik pasatu behar dela. Izan ere, sariek ez dute baliorik izanen elkarteko zigilu edo markarik ez badute.
Akatsak boletoetan
Errandakoa erranda, adi, kontuan hartu beharreko inprenta akats batzuk izan baitira: Batetik bi komertziok emandako sariak gaizki inprimatu dira, eta hori dela eta behar baino askoz kopia gehiago egin dira. Hortaz, adi ohar honekin. Mari Carmen arropa dendak eta Migelene eraikuntzak emandako sariak behar baino gehiagotan inprimatu dira. Beraz, Mari Carmen arropa denda ko opari sorpresa duenak, mobilendako brazaletea izanen du opari, eta aldrebes, mobileko brazaletea duenak (opari bakarra da horrelakoa), Mari Carmeneko opari sorpresa. Eta gauza bera gertatzen da Migelene Erainkuntzak-eko sariarekin; inprentak Migelene eraikuntza eta mendiko/ hondartzako materiala nahasi ditu.
Honetaz gain, bertze arazoa boletoetan ageri den urtearekin izan dugu; boleto batzuetan 2016 data ageri da, baina ez da deus gertatzen. Boletoen kolorea aldatu dute eta hortaz, 2016 paratu arren, kontutan hartu urdin kolorekoak direla aurtengoak, data dena dela ere.