Baztango kexen inguruko informazioa jasotzearen esperoan dago Gas Navarra

Ttipi-Ttapa 2017ko mai. 22a, 10:48

Horiek jasotzerakoan kasu bakoitza aztertu eta bezeroei zerbitzurik onena bermatzeko neurriak hartuko dituztela jakinarazi du

Irache Kontsumitzaile Elkarteak publikatutako oharraren inguruan, bertan aipatzen diren kexa eta erreklamazioei buruzko informazioa jasotzearen esperoan dagoela adierazi du Gas Navarrak. Propano gaseko instalazioak gas naturalera pasatzerakoan Baztango bezeroek izandako arazoak aipatzen ziren ohar honetan.

Gas Navarrak adierazi duenez, «konpainiak harreman estua eta etengabea dauka Irache Kontsumitzaile elkartearekin azken hamarkadetan eta kexa horiek lehenbailehen helaraztea espero dugu, kasu bakoitza aztertu eta bezeroei zerbitzurik onena bermatzeko neurriak hartzeko».

Aldi berean, Gas Navarratik diote Irache Kontsumitzaile Elkartearen esku jartzen dutela bezeroen kexa horiek lehenbailehen bideratzeko eta moldatzeko baliabideak. Gas konpainiak, Baztanen propano gaseko instalazioak gas naturalera egokitzeko prozesuari buruzko azalpenak emateko eskutitzak bidali zituen, komunikazio planaren baitan. Bezeroendako doaneko arreta telefonoa dutela (900 100252) ere jakinarazi du Gas Navarrak, edozein zalantza, azalpen edo erreklamazio egiteko.

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.


Egin TTIPI-TTAPAren lagun