Azaroaren 8an, asteartean 09:15ean sartu zen Elizegi Nafarroako Auzitegira. Aitzinetik, Baztango hainbat bizilagunek elkarretaratzea egin zuten, Jazarpen judizialik ez. Aroztegia gelditu! lelopean. «Baztango herritarren eta haien interesen alde egindako deklarazioengatik epaituko naute», erran zuen alkate ohiak, auzitegiko atarian.
Elizegik gaineratu zuenez, Palacio de Aroztegia SL enpresak Baztango zortzi bizilagunen kontrako salaketa jarri du. «Nire kontrako hirugarren salaketa da hau, eta horrek agerian uzten du auzia pertsonalizatu nahi dutela». Hala ere, baztandarren nahiz lekaroztarren nahia «oso argi» dagoela azpimarratu du Elizegik. «UPN, PSN, PP eta Geroa Bai libre dira kapitalaren interesen esanetara jartzeko, baina gu ere libre gara herritarren eskubideak defenditzeko».