Gerora ezagun egin den jende aunitz pasatu zen bere garaian Lekarozko ikastetxetik eta horietatik aunitz bueltatzen dira urtero. Aurten, Mexikotik Josetxo Barberena etorri zen, baita Jose Antonio Zaldua (FC Barcelona futbol taldean eta Espainiako selekzioan aritu zen baztandar bakarra), Pedro Miguel Etxenike fisikari ospetsua eta oraindik famatuagoa den Martin Berasategi sukaldaria ere, bertzeen artean. Denera, berrehun ikasle ohi baino gehiago.
Gaur egun Bilboko gotzaia den Mario Izetak eman zuen meza Elizondoko elizan. San Migelen irudia ere bertan izan zuten. Ondotik, Lekarozko txokoan segitu zuten bestarekin. Argazki zaharren erakusketan aunitzek beraien erretrato zaharrak ikusteko aukera izan zuten eta Joseba Aristizabalek zuzenduta, ikasle ohi talde batek prestatutako dokumentala ere ikusi zuten. Lekarozko tortilla dastatzeko aukera ere izan zuten.