Ramon Apezetxea Almandozko apezak bedeinkazioa eman zion, «garrantzitsuena ez da dirua, ilusioa eta lana baizik» erranez. 2010ean lanekin hasi zirenetik agertu diren XII. mendeko baselizaren arrastoak, txanponak, iltzeak edo balak ere ikusgai jarri dituzte baselizaren barrenean. Santiagoren irudia ere harriz egin du Cesareo Soule harginak. Baseliza bera egiteko ere, inguruan zeuden harriak bertzerik ez dituzte erabili.
Urdazubi-Baztango Donejakue Bideko Lagunen elkartearen lanari esker, Iruña bitarteko bide guztia (5 etapa) berreskuratua dago. Bide hau aunitz erabiltzen omen zen garai batean negu partean, normalean elurtua egoten zen Orreagatik baino, Otsondo eta Belaten barna xamurragoa izaten baitzen erromesen bidea.