Amaiur, Azpilkueta, Arizkun, Erratzu, Elizondo, Lekaroz, Irurita, Arraioz, Oronoz, Berroeta eta Anizko alkateek eta Baztangoiza, Elizondo, Erberea eta Basaburuako junteroek izenpetutako idatziak bizka emateko 15 arrazoi ere azaltzen dituzte: «Lekarozko herriak hala eskatu duelako; Baztango Batzar Nagusiak eskatu duelako; proiektuaren eragin zuzena lekaroztarrek eta baztandarrek pairatuko dugulako; ondorioz interes zuzena eta zehatza dugulako; herritarren iritzia plazaratzeko modu eraginkorra delako; bozkatzaileak baino herritarrak garelako; gure iritzia beti inportantea delako; herritarren arteko eztabaidetan lagungarria delako; azken urteotan urbanismoan izandako ustelkeri kasuak herritarrengan sortutako deskonfiantza arintzeko manera delako; demokrazian sakontzeko manera delako; gaur egungo demokrazien ezaugarri bat delako; ordezkari politikoen eta herritarren tartea ttipitzen duelako; gure agintariekin komunikatzeko modua ere badelako; gure etorkizunarekin arduratsu bihurtzen gaituelako eta herri arduratsu bat garelako».