Lekarozko Aroztegiako proiektuaz

Geroa Bai bakarrik agertu da Aroztegiko herri galdeketaren kontra

Apirilaren 1ean egin zen Batzar Nagusian 21 batzarkide galdeketa egitearen alde, 6 abstentzio eta Geroa Bairen kontrako bozka bakarra

Joan den ortziralean Baztango Batzar Nagusiak ohiko bilkura egin zuen eta gehiengo zabal batek Kuarteleteko batzarkideek aurkeztutako mozioarekin bat egin eta Aroztegiko Udalez gaindiko sektore plana gelditzeko eta afera herri galdeketaren bidez erabakitzearen aldeko proposamena babestu zuten. Proposamen horren alde 21 batzarkidek egin zuten, 6k abstentziorat jo zuten (UPNko 4ak) eta Geroa Bairen ordezkari bakarrak kontra bozkatu zuen. 

 

Bozketarat ailegatu orduko eztabaida luzea eman zen. Joseba Otondo batzarburuak gaia bideratzeko modurik zentzuzkoena, logikoena eta demokratikoena herri galdeketa egitea zela erran zuen. Ruben Ziganda Geroa Baiko ordezkaria galdeketaren aukera ezbaian paratu zuen, nahiz Geroa Bai galdekataren alde beti egon dela ere argudiatu, azkenean, galdeketaren aurkako bozka bakarra emateko. Galdeketaren bideragarritasunari buruz sortu zen eztabaidan Karlos Beristain batzarkideak Geroa Bairi, galdeketaren kontrako beren posizioa ezin zurituz ibiltzea egotzi zion. 

Bertzalde Miren Meokik Lekarozko alkateak bertze idatzi baten bidez, herriak Aroztegiko proiektuari buruz hartu zuen erabakiaren berri eman zuen Modu horretan, 2009. urtean herrian Aroztegiko birkalifikazioari buruz herri-galdeketa egin zela oroitarazi zuen eta gehiengo handia kontra agertu zela. Halaber, aurtengo otsailaren 19an herriko batzarrak Aroztegiko udalez gaindiko sektore plana gelditzeko eta Baztan mailako herri-galdeketa egiteko erabakia hartu zuela jakinarazi zuen.

Azkenik, Aroztegirekin loturik ere,  Nafarroako Gobernuak udalez gaindiko sektore plana gelditzeko Batzar Nagusiak egindako eskariari urtezahar egunean ezetz erran  ondotik, batzarkideen gehiengoak, ortziralean, Nafarroako Auzitegi Nagusirat jotzea eta  udalez gaindiko sektore plana errekurritzea erabaki zuen. 

 

TTIPI-TTAPA da Nafarroa Garaiko mendialdean dagoen euskarazko hamaboskari bakarra, eta zu bezalako irakurleen babesa behar du aitzinera egiteko.


Izan zaitez harpidedun