«Jarduera ekonomiko urria, langabezia, lan prekarietatea, eskualdearen garapen eskasa eta despopulatzea direla eta dagoen egoera zaila eta bailarako bizilagunen kezka ikusita, oso beharrezkoa deritzogu ekimen hau, Udala bailararen jasangarritasunarekin eta etorkizunarekin konpromisoa hartzea bilatzen baitu», azpimarratu du Baztango Geroa Baik.
Udal taldearen iritziz, Udalak bailararen etorkizunaren alde eman beharreko lehen pausoetako bat da batzorde honen sorrera, nahitaezkoa baita «bizilagunen bizi kalitatearen hobekuntzan eragina izango duen garapen ekonomiko handiagoa lortzeko beharrezkoa den interes eta esfortzua» egitea.
Bertzalde, Baztango Geroa Baik aipatu duenez, «orain gutxi proposamen ugari atera ditu aurrera, hala nola Arizkunenean wifi-a instalatzea, Lanbide Heziketarako zentroekin hitzarmenak aire zabalean gimnasioak instalatzeko hauek bailaran integratuz edo Udalak hainbat errefuxiatu familia hartzea eskatzea, bertzeak bertze».
Batzar Nagusia dela eta, Geroa Baiko udal taldeak Mendi Garbiketa Plan bat eskatu du, bai eta bizilagunen eta Udalaren artean piketeak banatzeko modua aldatzea. Orain arte erdi eta erdi banatzen zen, eta orain bizilagunek hartzen duten 5 piketeko, 3 izanen dira udalarentzat.