Hasiera batean, Barriola eta Ruben Beloki zeuden iragarriak, baina honek ezin izan zuen hurbildu, azken orduko arazoak zirela medio. Publikoaren artean zegoen Itxaso Fagoagari gonbidapena egin zion antolakuntzak eta lesakarrak borondate on guztiarekin solastu zuen ehiza eta kirolari buruz, Barriolarekin batera. Hogei bat lagun bildu ziren Olari jatetxean, eta solasaldi polit batekin gozatzeko aukera izan zuten, bi solaskideek beraien pasio kutsakorraren berri eman baitzuten.
Ondotik, David eta Ruben Garate Olondriz, Olari jatetxeko sukaldariek ehizako haragiarekin prestatutako jakiak dastatzeko aukera izan zen, hala nola, basurdea, usoa, oilagorra eta oreina, ardo on batekin bustita eta ondorik sagar pastela.
Baztango Ehiza eta Arrantza Elkarteari zapore gozoa utzi dio jardunaldiak, bai solaskideei baita publikoari etorri izana eskertu nahi diete eta nola ez Olari jatetxekoei, «lekua utzi eta jaki gozoak prestatzeagatik».