Ruben Saralegi leitzarra izanen da eskualdeko ordezkari bakarra ortziral eguerdian jokatuko den finalean
Herri kirolak maite dituztenek ere izanen dute non gozatua urriaren 30ean Elizondoko ferietan, eguerdiko 12etan hasita jokatuko baita Euskal Herriko bigarren mailako aizkora txapelketaren finala Iriarte pilotalekuan (euria eginen balu, Baztan pilotalekuan). Finala ikusteko 10 euro ordaindu beharko da sarrera.
Sei aizkolari izanen dira lehian. Ruben Saralegi leitzarra izanen da eskualdeko bakarra eta berekin batera berriki Nafarroako txapelketa nagusia irabazi duen Iker Vicente (Otsagi), Gipuzkoako Jesus Mari Mujika, Luis Mari Txapartegi eta Aratz Mugertza eta Arabako Arkaitz Jauregi lehiatuko dira. Aizkolari bakoitzak bi kanaerdiko, bi 60 ontzako, eta bi oinbiko enbor moztu beharko ditu. Lehen bi sailkatuak mailaz igo eta datorren urtean lehen mailan aritzeko aukera izanen dute.
Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.