Noka taldeko kideek a capella kantatzen dute eta noka emakumeen artean hitz egiteko moldea aldarrikatzen dute beren kantuetan eta jarreratan. Iaz, Mikel Markez kantautore euskaldunarekin bat egin zuten eta bira txiki bat konpartitu zuten Ameriketako Estatu Batuetan. Aurten, Euskal Herrira egin dute jauzi eta zenbait kontzertu eskainiko dituzte ondorengo egunetan, Nokez EH Tour delakoaren harira. Disko berria dakarte besapean: Bi ahizpak. Abuztuaren 7an, Elizondon (Nafarroa) kantatuko dute, Martikorenarekin. Iganderako, Arabara joanen dira (Espejo) eta 14an Zuberoan iragarri dute kontzertua (Garendainen), 16an Bizkaian bukatzeko, berriro Erramun Martikorenaren konpainian (Etxanon, Zornotzan).
Mikel Markezek (Errenteria, 1971) mende laurdena darama musikaren munduan murgildurik. Euskal Herriko txoko gehienetan kantatu du bakarlari moduan, bai eta kantari eta talde andanarekin kolaboratu.
