Baztango EH Bilduren ustez, «egoera hauek saihestea da alde guztien betebeharra eta batez ere ardura eta erabakiak hartzeko ahalmena duen Patronatuarena. Patronatuak bai 2009an bai 2014an aukera izan du kudeaketa zuzena eta publikoa egiteko. Bi kasuetan kudeaketa IDEA enpresa pribatuaren esku utzi nahi izan du, lehiaketa publikorik egin gabe eta azkenengo kasuan Udal Gobernuaren iritziaren kontra».
EH Bilduren arabera, lotura zuzena dago erabaki horien eta gaur egungo egoeraren artean: «Enpresa pribatu honek ez du langileak kontratatzerakoan froga objektiborik egiteko legezko betebeharrik, ezta langilen profesionaltasuna edo hizkuntz eskakizunak betetzekoa ere. Beraz, honek aukera handia uzten du entxufismo, faboritismo eta klientelismoan oinarritutako kontratazioak egiteko. Egoera honek kontratazioen inguruko susmoak sorrarazten ditu eta herritarren zein langileen haserrea pizten du».
Zerbitzua ahal den hoberen emateko langileen kontratazioa bere gaitasuna zein esperientziaren arabera izan beharko litzatekeela uste du EH Bilduk eta «hau bermatzeko kudeaketa publikoa da gardentasuna eta profesionaltasuna ziurtatzeko modu egokiena».
Bi ereduen arteko talka baten aitzinean gaudela dio EH Bilduk: «Gardentasuna, profesionaltasuna, eta langile zein erabiltzaileen eskubideak bermatzen duen kudeaketa publikoaren eredua, eta bertze aldetik dugu faboritismoa eta entxufismoa bultzatzen duen zerbitzu publikoen pribatizazioaren eredua».