Elizondoko abesbatza ttikiak Baztango Haur kantarien laugarren topaketa antolatu du otsailaren 28an, larunbat arratsaldeko 6:30etik aitzinera Iruritako elizan. Bertan haur andana bilduko da elkarrekin abesteko, Kristina eta Maki Urtasunek zuzentzen duten Elizondoko Abesbatza ttikikoekin batera, Baztango herrietako eskoletakoak, Baztan Ikastolakoak, San Francisco Javier ikastetxe publikokoak eta Lekarozko institutukoek parte hartuko baitute jaialdian.
Aitzinetik, otsailaren 22an, igandean, kulturarekin lotutako hitzordu bikoitza izanen da. 12:45ean Baztango Dantzariak taldearen eskutik Bailableak (Muxikoak, Jotak, Larraindantza, gaita…) dantzatzeko aukera izanen da Elizondoko Plazan. 19:00etan Iruritako Gizarte Bilgunean berriz, Hazparneko Anderea, Telesforo Monzonek idatzitako antzezlana taularatuko du Iduzkilore Antzerki taldeak, Ander Lipus taula zuzendariaren gidaritzapean. Baztango Kultura Batzordeak antolatu du antzerki emanaldia.