Euskal Herri osoko letrazaleak bildu nahi dituzte Baztanen euskal nobela beltzari buruzko topaketan. Ilbeltzaren 21ean Idazleekin solasean saioa antolatu dute, Eneko Aizpurua izanen da gonbidatua eta bere azken nobela, Herensuge gorriaren urtea, izanen dute hizpide asteazken arratsaldeko 7etan Anizko elkartean. Ilbeltzaren 22an, ortzegun arratsaldeko 7etan, Mariano Izetaren Dirua galgarri liburuaren berrargitalpenaren aurkezpena eginen dute Elizondoko Arizkunenea Kultur Etxean. Ondotik, Mariano Izeta. Euskal nobela beltzaren abiapuntu’ solasaldia eskainiko du Jon Abrilek.
Mariano Izetaren eleberriaren berrargitalpenaren baitan, Baztango Udalaren eta Ander Urrutia euskaltzainburuaren aitzinsolasak, Mariano Izetari buruzko zertzelada biografikoak, idazlearen gaineko ohar zenbait eta Mariano Izetaren lan nagusiak ere argitaratu dituzte.
Ilbeltzaren 23an, ortziral arratseko 8etan Baztango kontu beltzak izanen dituzte hizpide Elizondoko Gaztetxean.
Ilbeltzaren 24a izanen da ekitaldi gehieneko eguna. Larunbat goizeko 11etan, Beltzetik beltzera nobelaz mahai ingurua izanen da Arizkunenean, Itxaro Borda, Jon Alonso eta Miel Anjel Elustondo idazleekin. Bitartean, nobela beltzaren erakusleihoa ere ikusgai izanen da. 14:00etan bazkaria izanen da Eskisaroi jatetxean. Txartelak eskatzeko ilbeltzabaztanen@gmail.com helbide elektronikora idatzi behar da. Bazkalondoan, Juan Kruz Igerabideren Zangotraba nobelaren eta Joseba Larratxe Joseviskyren Requiem gauaren erdian komikiaren kafe aurkezpenak eginen dituzte. Iruritako Jauregiarte tabernan, 20:00etatik aitzinera susmagarrien gaua hasiko da eta afaria ere izanen da tartean.
Ilbeltzaren 25ean, igande goizeko 11etan Kronika beltz baten ibilaldia eginen da, Amaiurko plazatik abiatuta. 19:00etan, eta Baztango Bertso Eskolaren bosgarren urteurreneko ekitaldien baitan bertso trama eginen da Odei Barroso, Aiala Martin, Maialen Lujanbio eta Unai Iturriagarekin, Fernando Anbustegi gai-jartzaile dutela Elizondoko Arizkunenea Kultur Etxean.