Uztaileko uholdeek kaltetutako Baztango azpiegituren konponketak akitu dituztela aipatu dute Nafarroako Gobernutik, baina Garbiñe Elizegi alkateak adierazitakoaren arabera, «bakarrik emergentziazko lanak akitu dituzte eta Gobernuak hitz emandako 990.478 euroko dirulaguntza ez da oraino (abenduaren 18an) Udalera ailegatu».
Diru hau hitzemana dela eta ailegatuko dela uste du alkateak, baina 800.000 euro inguruko aurrekontua duten bertze lanak egin gabe daude eta horren finantziazioa zailagoa ikusten du. Gainera gogoratu du Nafarroako Gobernuak emergentzia lanetarako emandakoa lanen %70 bertzerik ez dutela estaltzen eta gainerako %30a, 400.000 euro inguru, Udalak ordaindu beharko duela.
Nafarroako Gobernuko Landa Garapen, Ingurumen eta Toki Administrazioko kontseilari José Javier Esparzak jarduera horiek bisitatu zituen abenduaren 16an, alkatearekin batera. Obrek 1.419.998 euroko aurrekontua zuten eta kopuru horretatik Nafarroako Gobernuak 990.478 euroko diru-laguntza emanen du.
Lanak harri-lubeten hormetan egin dira, arekak sendotu, garbitu eta eraikitzen eta fabrikako obrak berrezartzen, honako leku hauetan: Larretakoborda, Dorretxipikoborda, Kastonekoborda, Malkoa zubia, Aritzakun-Urritzate, Apate zubia, Mapitxenborda, Elizondo-Elbete zubia, Arraiozko zubia, Maxaborroborda, Zelaietakoborda, Beartzun, Gamiokoborda, Gorramendi-Estebenekoborda, Anitz zubia eta Lekueder zubia.
ELBETEKO ZUBIA
Astearte goizean bisitatutako lanetako bat Elbeteko errotako zubia da. Uholdeek kalte handiak eragin zizkion, eta berriz eraikitzeko ibilgua desbideratu behar izan zen atagiak jarriz. Ezkerreko eta erdialdeko begietako gangetako harlangaitz-horma ere eraitsi da, hormigoi armatuko zola eta petrilak barne.