Baztango Mutil Dantzari Taldeak baztandar guztiei eskerrak eman nahi izan dizkie ohar bidez, «Baztandarren Biltzarrean eta Elizondoko bestetan izandako mutildantzen emanaldietan erakutsi duten jokabide eta gizatasunagatik».
Ez dituzte alde batera utzi nahi izan «azken urteetako gertakari desatsegin batzuk (Elbete 2013, Gartzain 2013, Elizondo 2014)», baina honen inguruan «bakoitzak bere ondorioak atera ditzala», diote oharrean. Gaineratu dute, «mutildantza tradizionala irudikatu dutenean, ez dituztela inoiz emakumeak diskriminatu nahi izan».
Elizondoko bestei begira, Santio Egunean, «herriko plazan mutildantza mistoak normaltasun osoz ospatzen ari zirela, Ikastolako parkera hurbildu zen jendetza eta dantzari kopurua masiboa izan zela» azaldu dute, «ehunka biztanle eta 50 dantzari baino gehiago mutildantza tradizionalari babesa emanez».
Uztailaren 26an, mutildantza tradizionala toki publikoan ezin zela dantzatu eta, Elizondoko barride batek, Ana Mari Marinek, bere loretokia eskaini zuela azaldu du Mutildantzari Taldeak eta eskerrak eman nahi izan dizkiote. 600 lagun baino gehiago bildu omen ziren.
Uztailaren 27an, 70 mutildantzari baino gehiago mutildantzan ibili zirela dio oharrak, eta ekitaldiari akabera emateko «gertakari hunkigarria» gertatu zela: «zortzikoa dantzatu zen eta honetara hainbat emakume gehitu ziren dantzarien eraztun handia osatuz».
Mutildantzari Taldeak eskerrak eman nahi dizkiete Baztango biztanle, dantzari, txistulari, atabalari eta bereziki elkartea osatzen duten emakumeei. Eta Udalari eta eta herrietako alkateei, berriz, «normaltasuna berrezar» dadin dei egin diete, «2015ean biziki espero dugun elkartasuna behingoz lor dezagun, gure karriketan mutildantza behingoz gozatu ahal izateko. Dantza hau sentitu eta isladatzeko modu biak (tradizionala eta mistoa) normaltasun eta errespetu osoz eman behar direla onartuz».