Kepa Arizmendi Bereau hil zela bortz urte eginen du igandean. Bere ibilbidea gogoratzeko zenbait ekitaldi antolatu dituzte larunbaterako senide eta lagunek. Horrekin batean ortziral arratsaldean Elizondoko margolariaren omenez egindako liburuaren aurkezpena eta bere margolanen erakusketa inauguratuko dute Arizkunenean, ekainaren 29 artio iraunen duena.
Ortziralean, 18:00etan, Kepa Arizmendi Bereau-Baztan izeneko liburua aurkeztuko du Baztan Batzen lan taldeak. Hain zuzen, talde hau sortu dute Kepa Arizmendiren lagun eta senide batzuek, Elizondon 1958an sortu eta Baionan 2009an hil zen margolari honen lana eta ezohiko ibilbidea gogoratu nahian. 20:00etan Kepa Arizmendiren margo erakusketaren estreinaldia eginen da Arizkunenean. Erakusketa ekainaren 29a arte izanen da ikusgai.
Ekainaren 7an, larunbat goizeko 11:00etan rugby partida jokatuko dute Lekarozen. Bertze ekitaldiak Elizondon izanen dira. 13:30ean plaka paratuko da bere sortetxean eta ondotik triki-poteoa eginen da. 14:30ean bazkaria eginen da Antxitonea trinketean. Txartelak 15 eurotan eros daitezke Zubipunta, Dolatxea, Intza eta Zanguen edp 662 333787 telefonora deituta.