Nafarroako lauko sokatira txapelketan, gizonezkoen 320 kiloko eta emakumezkoen 265 kiloko kategorietan Amaiur A eta Basaburua-Imotz izan dira txapeldunak.
Gizonezkoen txapelketa aski berdindua izan da. Jautsaratsen jokatutako lehen jardunaldian Beti Gazte B nagusitu zen eta Amaiur A bigarren izan zen. Etxarri-Aranatzen, aldiz, bi talde hauek berdindu egin zuten beraien arteko tiraldietan eta bertze gainerako guziak irabazi. Lehen bi sailkatuen arteko finalean Amaiur nagusitu zitzaion Lesakako taldeari kitarakoan eta txapela lortu zuen. Talde txapeldunean, Lander Landiribar, Iñaki Urrutia eta Joseba eta Julen Jauregi aritu ziren lehen jardunaldian eta bigarrenean, Juanma Irigoien sartu zen Joseba Jauregiren ordez. Amaiur B hirugarren izan zen.
Orain gizasemeen 300 kilokoa eta emakumeen 245 kilokoa jokoan da. Emakumezkoetan partaide berak izanen dira eta gizasemeetan bat gehiago, Kaskailueta. Lehenbiziko jardunaldia maiatzaren 24an izan dute Berriozarren eta bigarrena maiatzaren 31n Lesakan.