Euskararen gizarte ezagutza handitu eta erabilera sustatzeko konpromisoarekin bat eginez, bi dirulaguntza deialdi egin ditu Baztango Udalak 2014rako: batetik euskara ikasteko eta bertzetik establezimenduetako errotulazio elementuak euskaraz paratzeko. Bi kasuetan 2.000na euroko aurrekontua onartu du.
Deialdietako bat euskara ikasteko ikastaroak egiten dituzten baztandarrei matrikula gastuetan laguntzeko izanen da. 16 urte baino gehiago dituztenendako eta urtebeteko antzinatasunez Baztanen erroldatutakoendako izanen da, eta ikastaroetan guttienez %80ko asistentzia izan dela egiaztatu beharko da.
Diru-laguntzak esleitzerako orduan langabezian edota 12 urte bitarteko seme-alabaren bat duten herritarren eskabideei emanen zaie lehentasuna eta horiei egokituko zaien diru-laguntzaren zenbatekoa gainerako eskaitzaileena baino %50 handiagoa izanen da. Edozein moduz, onuradunek ezin izanen dute 500 euro baino gehiago jaso deialdi bakoitzeko. Eskaerak irailaren 30era bitarte aukeztu beharko dira.
Bertze deialdian, merkataritza eta ostalaritza establezimenduetako, enpresetako nahiz elkarteetako errotuluak eta toldoak, atarien ondoko profesionalen plakak eta ibilgailu komertzialen errotulu elementuak euskaraz paratzeko diru-laguntzak emanen dira. Euskara hutsean idatzitako errotuluek lehentasuna izanen dute eta gastuaren %50 bitarteko laguntza jasoko dute, gehienez 500 euro. Euskaraz eta erdaraz idatzitako errotuluek, betiere euskarari lehentasuna emanik, egindako gastuaren %25 bitarteko laguntza jasoko dute, gehienez 250 euro. Eskabideak azaroaren 28rako aurkeztu beharko dira udaletxean.