Baztango Museoaren Kontseilu Errektorean, museoaren funtzioak sendotzeko eta aitzinera eramateko aukerak aztertu eta eztabaidatu ondoren, Baztango ondare naturala eta kulturala lantzen dituzten elkarte eta zerbitzuekin elkarlana bultzatzea eta sinergia sortzea beharrezkoa dela ikusi zen. Lehen pausoa apirilaren 14an aurkeztu zen gida-mapa diseinatzea izan da.
Gida-mapa honetan museoa ez ezik Baztango ondarea ezagutarazten duten zerbitzuen informazio ematen da, baita Baztango informazio orokorra ere. Baztanek daukan ondare natural eta kultural baliotsu eta dinamikoaren erakusle, gida-mapari (eta proiektu osoari) paratu zaion izena “Baztan: Natura eta Kultura Bizia” da.
Balleko Etxearen helburua ez da museo baten edo zerbitzu turistiko batzuen esku-orri soil bat diseinatzea, zerbitzu, elkarte eta iniziatiba guzi hauen elkarlana ere bultzatu nahi luke.
Horren harira, Museoan ikus ditzakegu gasna egiteko tresna zaharrak (zimitza, kaikua...) eta Anizko Jauregian ikus ditzakegu baserria, landak, behiak eta gasnategia; gasnaren ekoizpen prozesua ezagut dezakegu Gorramendiko gasnategian ere. Sagar-munduari dagokionez, Gamioxarreko dolare barrokoa martxan ikus daiteke, eta Larraldea sagardotegiak eskaintzen duen esperientzia probestu. Berdintsu, taloei dagokienez, Amaiurko eta Etxaideko errotetan eskaintzen diren bisita eta dastaketekin. Baztango eta Nafarroako historia ezagutzeko aukera ere bada Amaiurko gaztelu eta Iruritako Jauregiko bisitei esker.
Izan ere, Balleko Etxetik aipatzen dutenez, «zorionez badaude kultura sustatzen diharduten hainbat elkarte; gure ondare naturala eta kulturala ikertzen, zaintzen eta ezagutarazten aritzen direnak». Baztango Museoak elkarte hauek egiten dituzten lanak ezagutaraziko dizkio publikoari. Baztango museo eta zerbitzu sarearen proiektuaren lehen urratsa da hau. Honekin, turismoa eta merkataritza sustatu nahi dituzte, «gure bertako produktuak eta artisauak ezagutaraziz».
Gaur egun Turismo Bulegoa Baztango Museoan kokatuta dago eta gero eta turista gehiago erakartzen ditu. Turista hauek esperientzia autentikoen bila dabiltza, eta zentzu horretan proiektuaren gida-mapak dauden zerbitzu, bisita eta ekitaldi guzien berri emanen die.
Bertzalde, Museoan emanen den informazioaz gain, turistak ez ezik, herritar guztiak elkarteen ekitaldien berri izateko bertze argitalpenak, agenda, web orria eta sare sozialak hasiko dira erabiltzen aurki.