Liztor beltzaren kontrako informazio kanpaina egin dute herrietako eskoletan

«Gure inguruan liztor beltzaren presen­tzia haunditzen zihoala eta Nafarroako Gobernuak ez zuela eta ez duela esku har­tzen ikusirik, inguruan izan zezakeen eragin negati­boarekin kezkatuta», Baztango Ehiza eta Arrantza Elkarteak eta Udalak liztor beltzaren kontrako hitzarme­na sinatu zuten, herrietako eskole­tan informa­zio kanpai­na egiteko. Eta halaxe izan da, Ana Altzuri Lasarte elkarte­ko tekni­karia eskolaz eskola ibili da urtarriletik martxo­ra­ liztor beltza­ren inguruko xehetasunak ematen.

 

Eskolaz eskola, liztorra zer den eta inguruan eta guregan izaten ahal duen eragina azaldu die Anak, kontatu digunez, «gizakiontzat izan ditzakeen arriskuak azpimarratuz». Gisa honeta­ra, «liztorraren inguruan sortutako mamu eta izugarrizko izurritearen ideia burutik kentzea lortu nahi genuen, animaliarekiko erres­petua mantenduz». Tranpak nola eta noiz egin, eta nola berrikusi behar diren ikasi dute ikasle eta irakasleek. Plastikozko bi ur botilekin egindako tranpak­ egiten erakutsi die Anak, ba­rrenean zerbeza edo aquariusa sartuta. Tranpak 15 egunetik berrikustea gomendatu die eta ba­rre­neko likidoa berri­tzea. «Erlezainak ez bagara, uda hastean tranpa­ hauek erretiratzea da egokiena, gure mendiak zaborrez ez betetze­ko». Dena den, liztor beltzaren kontrola «utopia» dela dio Anak: «epe laburrean izanen dituen ondorio nagusiak erle eta fruituetan egiten ahal duen kaltea eta ondorioz, gertatuko den galera­ ekonomi­koa dira. Denborarekin erleak liztorraren kontrako defentsa­ asmatuko­ duela erraten duen teorian itxaropena izan behar dugu, bertzela, epe luzean, erleengan batez ere, izugarrizko kaltea egin dezake animalia honek egun bizi duen egoera kezkagarria larriagotuz. Erleak defentsa garatu bitartean, laguntza beharko du».

 

Baztango herrietako eskoletako neska-mutikoen aldetik, «hagitz erantzun ona» jaso dutela adierazi digu teknikariak eta hortaz, ikastetxeei eta elkartearekin kolabo­ratu duten baz­tandarrei, elkarteko bazkide eta gainerakoeei, eske­rrak eman nahi izan dizkie. Liztor beltzaren kontrako kanpainarekin hemendik aitzinera ere «hobetzen­ eta gauza berriak ikasten» saiatze­ko asmoa dutela­ argitu digu,«gure­ ustez, hedatuegia baitago eta ez duelako hedapenarekin gelditzeko asmorik». Hori bai, «animaliari zor zaion errespetua izateko» ere eskatu du.