Elizondoko polizia-etxe berriaren irekiera-ekitaldi ofiziala egin zen urtarrilaren 13an, Yolanda Barcina Nafarroako Gobernuko presidentea buru zela. Bertan, foruzainek eragin-eremua osatzen duten 27 udalerriei eta bertan bizi diren 26.000 herritarrei emango diete arreta.
Baztango Udalak utzitako 4.582,87 metro koadroko partzela batean egin dute eraikina, Erabeta eta Menditurri karriken artean. 2007tik Elizondoko Santiago karrikako lokal batean Foruzaingoak zituen bulegoak ordeztuko ditu. Obra I.C. Construcción enpresari esleitu zitzaion, eta 1.130.270 euroko kostua izan du.
BILDUK EZ ZUEN PARTE HARTU
Bilduk, ordea, ekitaldian parte ez hartzea erabaki zuen. Prentsara bidalitako oharrean adierazi zuenez, «2007ko otsailaren 28an Elizondoko komisaria inauguratu zen. Errepresore taldeak ekitaldian protesta baketsua egiteko asmoa zuen gazte koadrila kolpatu, identifikatu eta isundu zuen. Gazteen asmoa UPNren polizia politiko izaera salatzea bertzerik ez zen». Bilduren ustez, «lehenbiziko momentutik erakutsi zuten euren benetako jarrera zein izanen zen eta berdin segitzen du». Komisariaren finantzaketaz, lehengoan Nafarroako Gobernuak 165.386 euro inbertitu zituela ohartarazi du Bilduk eta honetan, «krisi garaian, lizitazio kostua 909.500 eurokoa izan da».