Erroten Eguna ospatu zuten urriaren 19an Infernuko Errotan, beharbada gure inguruan dagoen errotarik berezienean eta ezkutukoenean. Heldu den urteko bestarako lekukoa, berriz, Urdazubikoak hartu du.
Partehartzaileak autoz eta oinez hurbildu ziren Etxalartik eta Irigoiengo bordatik eta Argarate familiak zaharberritutako Infernuko Errota ikusteko aukera izan zuten. Arizkungo Patxi Larralde txistulariak eta Xabier Durruty atabalariak paratu zuten musika giroa eta Joxemari Argaratek azaldu zuen Infernuko Errotaren zaharberritze prozesua. Gero, Etxebertzeko Bordan, Argaratek berak eta Maria Mitxelenak prestatutako taloak dastatzeko aukera izan zen.
Ekitaldia akitzeko, heldu den urterako Errota Egunaren lekukoa jaso zuen Santiago Villares, Urdazubiko alkateak Etxebertzeko Bordako Mikel Argarateren eskutik, Mikel Ortega Baztango udal zinegotzia eta Bertizko Partzuergo Turistikoko Izaskun Goñi lekuko zirela. Beraz, heldu den urtean Urdazubiko Errotan ospatuko da Errotaren Eguna.