Baztango Zahar Etxea lan hitzarmenaren alde, murrizketarik ez goiburupean elkarretaratzea egin zuten erresidentziako langileek urriaren 1ean Elizondoko plazan.
Langileek aipatu zutenez, 2009an Patronatuak orduko udal kideek bultzatuta, Zahar-Etxearen gestioa Idea e Innovación enpresaren eskuetan utzi zuten, langile Komitearen eta langileen iritziari entzungor eginez. Langileek diotenez, «ezin erran daiteke, urte hauetan langileen egoera hobetu denik, azken lau urteetan hitzarmena negoziatu dugunean, 3 urtez soldatak izoztu dizkigute eta behin bakarrik izan dugu soldata igoera. Hau da 3 urtez langileok eros-ahalmena %2,5 galdu dugu. Gainera, 2012ko abenduko paga extra prorateaturik ordaindu digute, beraiek sinatu gabeko enpresa paktuari baldintzak aldatu ondotik».
Orain, Zahar-Etxeko langileek enpresa paktu bat dutenez eta Nafarroako hitzarmen sektorialik ez dagoenez gerentziari Zahar-Etxeko lan hitzarmen bat negoziatzea eskatu zioten. Enpresak hasieratik erran zuen negoziatu ahal izateko langileek soldata jautsiera onartu behar zutela, bertzela ez zegoela negoziaketarik. Honela, langileek mobilizazioetara jo behar izan dute eta azkenean negoziatzen hasi ziren. Enpresak, ordea, ez du bere nahietan gibelera egin eta soldataren %5eko jautsiera ezartzeko asmoa dauka.
Langileek behin eta berriz jakinarazi dute ez dutela soldata jautsierarik eta lan baldintzak okertzerik onartuko, arrazoi nagusi birengatik: «Lehen ere gure soldata ez zelako altua eta gainera orain murrizketekin oraindik eta baxuago delako horrek gure familietan suposatzen duenarekin eta gure lan baldintzen okertzeak gure agureek jasotzen duten atentzioan eragin negatibo nabarmena izanen duelako».