Baztango Udalak Baztango mintzoa erabiltzeko gida aurkeztu zuen urriaren 14an. Gida-liburuxka hau Baztango euskara, ahoz nahiz idatziz, ongi erabiltzen laguntzeko prestatu duten eskuliburua da. Izan ere, egunerokoan mintzatzean ibili ohi ditugun hainbat solas (erraterako: bertze, aitzin, erran…) idazteko orduan baztertzen ditugu egokiak ez direlakoan eta horien ordez hedadura zabalagoa duten (baina ez gureak baino zuzenagoak diren) bertze batzuk ibiltzera jotzen dugu (beste, aurrera, esan…).
Baztango mintzamoldea erabiltzeko gida erabilgarri honek bi helburu nagusi ditu: baztandarrei beren mintzamoldea, solasean nahiz idaztean, erabil dezaten segurtasuna ematea eta baztandarrak ez diren hemengo euskararen ezaugarriak ezagutu eta balioesteko bide ematea, beraiek ere erabiltzeari ekin diezaioten.
Baztango mintzoa erabiltzeko gida Udalerriko eskoletako maisu-maistrendako eta institutuetako irakasleendako bereziki pentsatuta dago baina horiendako ez ezik Udal zerbitzuetako langileendako eta gure eskualdean jarduten duten hedabideetako erratari edo erredaktoreendako ere erabilgarria izan daiteke. Funtsean, Baztanen aritzen den eta hemengo euskara ongi erabili nahi duen orori gerta dakioke baliagarria.
Argitalpena paperezko euskarrian eta euskarri digitalean zabalduko da. Inprimatutako aleak udalerriko ikastetxeetan, udal zerbitzuetan eta hedabideetan partituko dira. Banaketaren helburua ez da ikasle, irakasle eta langile orok gidaren bere alea izatea, ikasgela, mintegi, administrazio edo zerbitzu atal bakoitzean liburuxka bat bederen egotea baizik. Inprimatutako aleren bat gehiago behar izanez gero, Baztango Udaleko Euskara Zerbitzuan eskatzen ahal da (telefonoz: 948 580 006; e-postaz: euskara@baztangoudala.eu).
Euskarri digitaleko dokumentua Baztango Udalaren webgunean (www.baztangoudala.eu) dago eskuragai.