Elbeteko bestetan mutildantza dantzatzera sartu zen Baztango alkatea eta gainerako dantzariak gelditu egin ziren. Gertakari horrek soka luzea ekarri du. Elbeteko herriak eta besta batzordeak alde batetik, Plazara Dantzara herri ekimenak bertzetik eta plazara sartu zirenek azkenik, euren iritziak azaldu dituzte.
Elbeteko herriak eta Besta Batzordeak diotenez, «zenbait presio eta dei telefoniko jasan behar izan ditu Plazara Dantzara Plataformaren aldetik», baina besten egitaraua osatzerakoan, «denen gustuak eta sensibilitateak isladatzen saiatu gara, mutildantzetan denek dantzatzeko aukera emanez». Honela, egitarauak hau zioen: Santa Kruz egunean, goizean, Elbeteko Mutildantzarien saioa. 21etan, Baztango Mutildantzari taldearen emanaldia, eta azkenik ordutegi ofizialean, mutildantzak denendako. Mutildantza mistoaren aldekoek ere begi onez ikusi omen zuten egitarauan zehaztutakoa. Gero gertatukoaz, zera dio Elbeteko herriaren eta besta batzordearen idatziak: «Pertsona zenbait, ez dakigula partikularki edo norbaiten edo zerbaiten izenean azaldu ziren bestak izorratzera».
Elbeteko Herriak eta Besta Batzordeak diotenez, «elkarbizitza errespetua eskatuz lortzen da baina, nola ez, aldi berean erabaki eta sentsibilitate desberdinak dituztenenganako errespetua izanik, eta ez ikusi ditugun larderiazko jarrera intoleranteekin, ezta inposizioaren bidetik ere». Gertatutakoa sentitzen dutela aipatu ondotik, «datorren urtean saiatuko gara, uzten badigute, besta ederrak antolatzen» dio Bestetako Batzordearen eta Elbeteko herriaren idatziak.
PLAZARA DANTZARA HERRI EKIMENAREN ERANTZUNA
Plazara Dantzara Ekimenak erantzun egin die bi erakunde horien «akusazio larriei», ez duela inolako presiorik egin erranez: «taldeak egindakoa informazioa ematea eta eskatzea, galdetzea izan zen, inondik ere ez presioa egitea. Gaur egun norbaitek presioa jasaten badu horiek plazetan libre dantzatu nahi duten emakumeak dira». Ekimenak harriturik ikusten du «nola Elbeteko herriak bere plazan duela bi urte eta aurten emakumeek, hemen bai, jasan behar izan dituzten irain, mehatxu eta eraso fisikoei buruz ez duen deus erran, ez du deus salatu eta ez ikusiarena egin du eraso hauek gerta zitezeela ahabidetuz».
Baztango Mutil Dantzarien taldea «baztertzailea» dela dio ekimenak, «espazio publikoaren erabilera partikular eta pribatiboa egiten du, nesken parte hartzea saihesteko helburu garbiarekin». Elbeteko herriak instituzio ofizial moduan «jokaldi baztertzaile horretan parte hartzea kezkagarria eta onartezina» iruditzen zaio. Modu berean, eguerdian Elbeteko mutil dantzariek «modu esklusiboan iaz hasi zuten dantzaldia agerian gelditu da neskek parte ez hartzea bertze helbururik ez zuela. Dantzara taldekoa ez zen gizonezko bat sartu zenean dantzak lasai segitu zuen. Emakumezkoa sartu zenean berriz, alde egin zuten dantzariek».
PLAZARA SARTU ZIRENEN IRITZIA
Mutildantza herriarena dela eta pribatizatzeko dagoen saiakeraren kontra daudela azaldu du prentsa aitzinean herritar talde batek. Beraiek ere zaindu, mimatu eta babestu nahi dutela ondare kulturala den mutildantza eta guzi horregatik emakumeek ez dantzatzeko helburuarekin sortutako taldean sartu zirela Elbeten.Mutildantza ez dela gizonena bakarrik dio talde honek: «Mutil dantza herriarena da, denona, ikusle eta dantzariona, Zahar eta gazteena, gizon eta emaztekiena, gure kulturaren ondarea da. Eta hala denez gure ardura da babestea, mimatzea, zaintzea eta hori ezinezkoa da emakumeak, hainbatetan dantzen bizi iraupenaren eragile izan direnak, berriz diogu ezinezkoa da emakumeak baztertuta, emakumeak irainduta, emakumeen nahia mugatuta».
Taldeak dio ezin dela onartu herriarena den ondarea pribatizatzea eta pribatizazio horri gainera plaza publikoak eskaintzea. «Kolpatu eta iraindu, plazatik bortxaz atera gaituztenak ezin dira herriarena den ondarearen jabe eta zaindari bihurtu» diote idatzian.