Faxismoari stop, mehatxurik ez lelopean 160 lagun inguru bildu ziren abuztuaren 29an Elizondoko plazan, uda honetan Baztango alkate Garbiñe Elizegik eta Elizondoko alkate Mikel Sobrinok jaso dituzten heriotz mehatxuak salatzeko.
Agrupacion de Nacionalistas Navarros delako taldeak sinatutako idatzien bitartez jaso dituzte heriotz mehatxuak Elizegik eta Sobrinok, herriko bestetan eta Baztandarren Biltzarrean euskal preso politikoen eskubideen aldeko ekimenak baimendu edo babesteagatik, baita ikurrina bezalako Euskal Herriko sinboloak defendatzeagatik ere eta Espainiako bandera ez jartzeagatik.
Agrupacion de Nacionalistas Navarros delako taldearen arabera, Baztango eta Elizondoko alkateek ez dute Herriko Etxean Banderen Legea bete eta herrietako bestak erreibindikazio politikoak egiteko aprobetxatzen dituzte, eta ikurrina eta Euskal presoak Euskal Herriratzeko banderinak jartzen ditu adibidetzat. Arrazoi horiengatik, ANN taldeak «uztailaren 15ean egindako bileran, ahobatez heriotzera zigortu dituela» zioen lehen mehatxu-eskutitzak. Zigor hori ez betetzeko baldintzatzat Balleko udaletxean Espainiako bandera jartzea eta ikurrina kentzea eskatzen zuten. Hurrengo mezuetan ere «mehatxuak berretsi» zituzten. Abuztuaren 13ko datarekin eskutitz baten bidez eta posta elektroniko bidez, bi idatzi hartu zituzten udaletxean, aitzineko gutuneko sinadura berarekin: Agrupacion de Nacionalistas Navarros. «Ikurrina kendu eta Espainiako bandera jartzeko» exijitu zieten eta are gehiago, gutunean inposatutako baldintza ez betetzeagatik abuztuaren 26tik aitzinera herio mehatxuak aitzinera eramanen zituztela ere idatzi zuten.
ERANTZUNAK
Mehatxuen berri eman zutenean, Bakartxo Ruiz eta Xabi Lasa EH Bildu eta Aralar-NaBaiko Nafarroako parlamentariak Garbiñe Elizegiren ondoan izan ziren prentsaurrekoan. Ruizek adierazi zuenez, «azken hilabeteotan EH Bilduren eta bere hautetsion aurkako mehatxuak biderkatu bertzerik ez dira egin. Ministroen mehatxuak, epaileen mehatxuak, eta kasu honetan, reketeen mehatxuak. Ilegalizazio mehatxuez ari gara, baita heriotz mehatxuez ere. Zergatik eta euskal preso politikoen eskubideen aldeko ekimenak baimendu edo babesteagatik, baita ikurrina bezalako Euskal Herriko sinboloak defendatzeagatik ere». Mehatxu hauek guztiak «ez dira Bildu eta EH Bilduren hautetsien kontrakoak bakarrik, baizik eta EH Bilduk defendatzen duen ezkerreko proiektu soberanista bozkatu eta babesten duten hiritar guztien kontrakoak».
Joan den astean egindako agerraldian, berriz, Begoña Sanzberro UPNko zinegotziak Bilduren jarrera kritikatu zuen, mehatxu horien inguruan «estrategia» darabiltela leporatuz. Gaineratu zuen, mehatxuen berri izandakoan beraien elkartasuna adierazi ziela. Bildurendako «mehatxu batzuk onak eta bertzeak txarrak» direla kritikatu zuen Sanzberrok eta «alderdikeria» egotzi zien: «Bertze zinegotziok mehatxuak jaso ditugunean ez dute hainbertzeko zalaparta egin».
BATZAR NAGUSIKO KIDEEN BABESA JASO DUTE ELIZEGIK ETA SOBRINOK
Mehatxu hauek onartezinak egiten zaizkie Batzar Nagusiko kideei, «ez baitira alkate hauen aurkako mehatxuak bakarrik, baizik eta beraiek ordezkatzen dituzten herrien aurkakoak, beraz, baztandar guztien aurkako erasoak dira». Ikurrina Euskal Herriko ikurretako bat da, «Baztandarren Biltzarra egunean eta herriko bestetan urteetan erabili izan dena eta baztandar gehiengoak herriko ikur bezala hartzen duena». Nafarroako Gobernuak ere ikurrina jartzea debekatu nahi izan du eta Udala auzitegietara eraman du ikurrina jartzeagatik eta aldi berean «arrotza eta iraingarria egiten zaigun Espainako bandera jarrarazi nahi digute».