Bestaz bestako ibilbidean, Arraiozek hartuko du lekukoa asteburuan. Ortziralean, 12:00etan botako dute bestei hasiera emanen dien altxaferoa eta segidan txistulariak alaituko dituzte herri inguruak. Egunez haurrak izanen dira protagonistak. Hala, 14:00etan haurren bazkaria izanen da, 15:00etan haurren jokoak eta ondotik txokolatada eginen dute. 20:00etan dantzaldia izanen da Agerralde akordeoilariarekin eta 21:00etan Mutildantzak eta muxikoak. 21:30ean Baztan-zopak eta 01:00etatik aitzinera berriz Agerralderekin dantzan aritzeko aukera izanen da.
Larunbatean, 10:00etako argisoinuen ondotik, 11:00etan herriko xaharrendako karta jokoak eta hamaiketakoa eskainiko dira. 11:30ean plater tiroketa txapelketa jokatuko da eta 14:30ean gazteen bazkaria eginen dute. 17:00etan mus txapelketa jokatuko dute Arizti Elkartean. 18:30ean tortilla txapelketa eginen da eta segidan tortillak dastatzeko aukera izanen da. 20:00etan muxikoak izanen dira eta 23:30ean kontzertua Skakeitan taldearekin. Gaita-joleak ere ibiliko dira eta eguna bukatzeko, Trikidantz taldearen emanaldia eta DJ Julenek jarriko diote gauari musika ikutua.
Igande goizean, 10:00etan, argisoinuak izanen dira eta 18:00etan herri-kirol saioa izanen da eta segidan, Anje Duhalderen kantaldia. Hondarreko eguna astelehena izanen dute Arraiozen. 14:30ean zikiro jatea eginen duten bertsolariekin eta 20:00etan dantzaldia izanen da Agerralderekin, ondotik bestei akabera emateko Gaixoak gu!-ren txanda izanen da.