Faxismoari stop. Mehatxurik ez lelopean kontzentrazioa deitu du Baztango Udalak ortzegun honetarako. Elizondoko Foru plazan biltzeko deia egin du, 20:30ean.
Azken asteetan, Garbiñe Elizegi Baztango alkateak eta Mikel Sobrino Elizondoko alkateak heriotz mehatxuak jaso dituzte, herriko bestetan eta Baztandarren Biltzarrean euskal preso politikoen eskubideen aldeko ekimenak baimendu edo babesteagatik, baita ikurrina bezalako Euskal Herriko sinboloak defendatzeagatik ere. Zehazki hiru mehatxu larri jaso dituzte. Agrupación de Nacionalistas Navarros delakoak egin ditu mehatxuak eta heriotz-mehatxuak ez betetzeko baldintzatzat, Elizondoko udaletxean Espainiako bandera jartzea eta ikurrina kentzea eskatzen dute. Eskutitzan abuztuaren 26a, gaurko eguna, paratu izan dute epe bezala.