Aurtengoan ere, abuztuko lehendabiziko larunbatean ospatu da Bertan-Baztan eguna Elizondon. Egun osoan pil-pilean egon zen Jaime Urrutia karrika, komertzioen postuak, kale animazioa, talogileak eta ekitaldi gehiagorekin. Erraterako, Etxaideko talogileak ere bertan izan ziren eta Foruen Enparantzan, berriz, V. Argazki lehiaketara aurkeztutako lanen erakusketa egin zen eta sariak banatu.
Nagusiek komertzioen eskaintzak ikusi eta erosten zituzten bitartean, haurrek ere izan zuten non jostatu, puzgarriak, txutxu trena, aurpegi margolaria eta karrika animazioa izan baitzen.
Guzira elkarteko 28 komertziok parte hartu dute Bertan Egunean: Pottoki, Maricruz, Nafarpress, Zangue, Kattalingorri, Quevedo, Frutas Baztangoa, Arrikulunka, Ruiz, Piko-Piko, Elizalde, Izeta, Argibel, Mallenea, Fantxike, Zagua, Axun-frutak, Ipingi, Galarregi, Iparla, El Zapato de Inma zapatak, Betizu, Artesiaga, On egin, Iris loredenda eta Esarte eta Ziaurriz harategiak. Gainera, zazpi ostatutan, Mendi, Kasino, Futbolin, Txokoto, Elbeteko Posada, Frantsene eta Eskisaroien 800 pintxo doan eskaini dituzte.
V. argazki lehiaketako saridunak
Uztailaren 30ean, Bertan-Baztan elkarteak antolatutako V. argazki lehiaketako epaimaiak, aurkeztutako 50 argazkien artean, 2014ko egutegia osatuko duten argazkiak aukeratu zituen, baita hiru argazki sarituak zeintzuk diren ere: 1. saria, 400 euro, Elizondoko Edurne Biguriak irabazi du, eta 2. eta 3. sariak Oronoz-Mugairiko Josu Inziartek (200 euro) eta Pello San Millan elizondarrek (100 euro) eraman dituzte. Bertan Egunean, arratsaldean eman zitzaizkien sariak.