Larunbat honetan, uztailak 27, herri harresia osatzeko deia egin du Eleak mugimenduak, 12:00etan. Lau auzitako auzipetui erakutsiko diete babesa: alde batetik, Iruñerriko Aritz Azkona, Luis Goñi, Xabier Sagardoi, Maider Caminos eta Mikel Jimenezi; bertzetik, 2012ko martxoaren 29ko grebaren harira atxilotutako Irantzu Ialdebere, Jon Telletxea, Urtzi Martinez eta Aitor Fernandezi; horrez gain, Segi kide izatea leporatzen dieten 40 gazteei eta azkenik, herriko tabernen inguruan zabalik dagoen 35/02 sumarioan auzipetutakoei.
Nafarroaren erresistentziaren ikurra delako aukeratu du Eleak mugimenduak Amaiur herri harresia osatzeko. «Orain 500 urte birrindu zuten harresia berregingo dugu; kantuz, hitzez, sentimenduz eta borrokarako grinaz». Halaxe adierazi zuten Eleak-ekoek asteburuan deialdia aurkeztu zutenean.