Baztanen eskuara barra-barra lelo berriarekin, aurten 50. aldiz baztandarren besta haundia ospatuko da uztailaren 21ean. Aurten ere egun osoko besta izanen da eta hori horrela izateko egitarau osatua prestatu du Baztandarren Biltzarra elkarteak. Aldi honetako hitzordua, gainera, berezia izanen da, aurten 50 urte baitira besta hau egiten hasi zela. Hala urte osoan hainbat ekitaldi egiten ari dira herriz herri, eta kanta ere egina da urteurrenaren karietara.
Uztailaren 21eko egun handiari dagokionez, 10:00etatik aitzinera artisauen erakusketa egonen da ikusgai Pedro Axular karrikan. 11:00etan herri bakoitzak prestatutako orga apainduen desfilea hasiko da. 14:00etan Mutildantzak izanen dira Elizondoko plazan eta ondotik herri bazkaria izanen da Merkatuko zelaian.
Bazkal ondotik ere izanen da zertaz gozatu. 16:00etatik aitzinera kantaldia eta tonbolaren zozketa eginen dira eta ez dira faltako mutildantzak, Baztango gaita, muxikoak eta larraindatza ere. 18:00etan hasita Trikidantz taldeak dantzaldia eskainiko du Laxoako plazan eta ondotik Laiotz taldeak hartuko dio lekukoa.
50 URTE
1963an lagun talde bat izan zen Baztango herriak bildu eta besta bat antolatzeko pausua eman zuena. Hura izan zen Baztandarren Biltzarraren hasiera. Geroztik euri aunitz egin du, mende erdia pasatu da eta gaur egun Euskal Herri osoan aski ezaguna bihurtu da besta hau. Uztailaren 21ean ere jendetza elkartuko da Elizondoko karriketan barna.