N-121B errepideko Elizondoko sarbideak eztabaidaren erdian segitzen du. Irurita-Elbete errepide berritik Elizondora sartzeko bidea itxita dago orain, harri batzuk paratuak baitaude. Sarbide horrek herritarren haserrea eragin du, batez ere Baztan Berri auzokoena, saihesbidetik Elizondora sartzeko auzo horretatik pasatzearen aldekoa baita Nafarroako Gobernua. Elizondoko herriak bertzelako aukerak proposatu izan dizkio Gobernuari baina honen erantzuna ezezkoa izan da eta maiatzaren 20rako harri horiek kendu eta sarbidea irekiko duela iragarri du.
Elizondoko Herria, ordea, ez dago horrekin ados eta herri galdeketa egitea erabaki du: sarbidea ireki bai ala ez. Galdeketan ateratzen dena errespetatuko du Udalak. Berez, orain dauden harriak kentzeko eskumena Nafarroako Gobernuarena da, baina herri sarreraren konpetentzia Udalarena da eta beraz, herri galdeketan sarbidea ez irekitzea nagusituz gero, herri sarrera itxiko luke Udalak.
Nafarroako Gobernuak errandakoaren berri eman eta herri galdeketaren planteamendua azaltzeko batzarrea eginen da asteartean, 20:00etan Arizkunenean. Herri galdeketa, berriz, igandean eginen da, 11:00etatik 14:00etara.