Iruritan eskuaraz ospatuko dute otsailaren 23an, larunbatean, eta horretarako ekitaldi ugari antolatu ditu Iruritako herriak, Baztandarren Biltzarraren eta Xorroxin Irratiaren laguntzarekin. Musikaz blai egonen da Gizarte Bilgunea, 19:30etatik aitzinera. Hasteko, bigarren solairuan Garazi Goienetxe bakarlaria ariko da eta 20:30ean, Mikel Urdangarin eta Rafa Rueda igoko dira oholtza gainera. Sarrera 8 euro ordaindu beharko da. Segidan, Gizarte Bilguneko ostatuan, dohainik, Baztango bertso eskolakoek bertso musikatuak eskainiko dituzte 22:30ean. 23:30etik 1:30era Trikidantz taldea ariko da eta besta goizeko ordu ttikiak arte luzatuko da DJ Tirri-Terik jarritako musikarekin.