Larunbatean, otsailaren 23an, inguruko haur eta gazteak kantuan arituko dira Iruritako parrokian 19:00etatik aitzinera. Iaz lehenengoz egin zuten ekimena eta izan zuen arrakasta ikusita aurten errepikatu eginen dute. Elizondoko abesbatzak, Iruritako parrokiaren eta Guraso Elkartearen laguntzarekin, antolatu du kantaldia. Aurreiritziak gainditu eta musika korala ezagutzeko bidea izanen da. Kantuan gozatu, mugimendua landu eta bide batez, haur eta gazteek kultur ekitaldietan parte hartzea bultzatzea da topaketaren helburua.
Iaz 150 haur inguru elkartu ziren eta aurten ere, haur andana bilduko da. Elizondoko abesbatza ttiki, Giltzarri txiki, Baztango Herrietako eskolak, Baztan Ikastola, San Franzisko Javier Ikastetxea eta Lekaroz Bhiko ikasleek abestuko dute. Pianoa jotzen Rodrigo de Vera ariko da, akordeoian Gurutze Aizpuru eta Izaskun Iparragirre eta zuzendari lanak Kristina eta Maki Urtasunek beteko dituzte.