Urtarrilaren 19an izan ziren Anizko inauteriak. Egun bakarreko besta ez aski nonbait, eta bezperan Mendiarte Kultur elkartean afaldu zuten gazteek. Goizeko ordu ttipiak artio iraun zuten, baina halere, biharamunean goizik berriz Elkartean ziren gosaltzeko prest.
Eguerdia pasatua zela, etxez etxeko eskea hasi zuten Sonborrotik, trikitixa eta panderoaren laguntzarekin. Puxkak xaretoan bildu ondotik ilunabarrean berriz ere Mendiarterat itzuli ziren bildutako xingarra, xixtorra, arraultzeak... afaltzera. Aski gustura ibili ziren 16 aniztar eta berrotar Anizko inauterietan. Urtarrilaren 26an, aniztarrak izan ziren Berroetarat joan zirenak. Aspaldiko partez bezperan, Berroetako baserrietan barna ibil dira puxkak biltzen, eta larunbatean herrian etxez etxe.